Сапарбаев шетелдіктерге Ақтөбенің қашан миллиондық қала болатынын айтты

28 Марта 2016 2281 Сапарбаев, Ақтөбе, бизнес-клуб

Алматы. 28 наурыз. Ақпараттар орталығы. Ақтөбе агломерациясы аумағында өнеркәсіптік сала мен аграрлық секторда индустриалдық аймақ құру үшін учаскелер бөлінуі мүмкін, деп мәлім етті облыс әкімі Бердібек Сапарбаев Астанадағы Дипломатиялық бизнес-клубтағы отырыс барысында.

«Агломерация аумағында өнеркәсіп пен аграрлық кешен саласында индустриалдық аймақ құру үшін 500 гектарға дейін жер телімдері бөлінуі мүмкін», - деп мәлім етті Б. Сапарбаев.

Оның пікірінше, Қобда мен Мәртөк аудандарының жер телімдері «агроөнеркәсіптік индустриалды аймақ құру мысалдарының бірі ретінде» қарастырылуы мүмкін.

«Батыс Еуропа - Батыс Қытай» жол торабының Мәртөк ауданының үстінен өтіп жатқанын ескерер болсақ, аталмыш аудан қолайлы жерде орналасқан. Қобда ауданы да қолайлы жерде орналасқан. Екі ауданның да картоп, көкөніс, жеміс-жидек, майлы және дәнді-дақылдарды егуге климаттары да қолайлы», - деп атап өтті әкім.

Ол мемлекет басшысы Н.Назарбаев Қазақстан халқына жолдауында Астана, Алматы, Шымкент және Ақтөбе қалаларының Қазақстанның алғашқы урбанистік орталығы болатынын атап өткенін еске салды.

«Ақтөбе Ақпарат» дерегінше, Ақтөбеде бүгінде шамамен 596,5 мың адам тұрып жатыр. 2 жыл ішінде 22 000 адамға артты. Жалпы болжам бойынша, 2020 жылы агломерация халқының саны 645 мыңға жетті, 2030 жылы – миллионға жетеді.

Соңғы 5 жылда Ақтөбе облысының негізгі капиталына салынған инвестиция 12,6 млрд АҚШ долларын құрады, оның ішінде 36% немесе 4,7 млрд доллар тікелей шетел инвестициясының үлесі. Бес жыл қорытындысы бойынша өңір тартылған шетелдік инвестиция бойынша республикада 2-орында тұр, әлемнің 100 елімен сауда қарым-қатынастары орнатылған, сыртқы сауда көлемі 3,7 млрд долларды құрайды, оның ішінде 84% ақтөбелік тауарлар мен қызметтердің экспортының үлесіне тиесілі.

Дипломатиялық бизнес-клубтың отырысына ҚР-дағы 43 дипломатиялық миссия өкілдері қатысты. Олар: АҚШ, Ресей, Қытай, Канада, Франция, Бельгия, Норвегия, Индонезия, Иран, Малайзия, БАӘ мен басқа бірқатар елдер.